lørdag 13. juni 2009

ဆရာကြီးပါမောက္ခ ဒေါက်တာအေးကျော် မိန့်ခွန်း

ပါမောက္ခ ဆရာကြီးဒေါက်တာအေးကျော်၏
ပထမအကြိမ် နိုင်ငံတကာ ရခိုင်အမျိုးသားအသင်း (ဥရောပ) ဋ္ဌာနခွဲ ပထမအကြိမ်ညီလာခံဖွင့်ပွဲမိန့်ခွန်း


WAO (ဥရောပ)က ကမကထလုပ်ပြီးကေ ဆောင်ရွက်တေ အေပွဲမာ ကျနော့ကိုဖိတ်တေအတွက်ကြောင့်အား လုံးသူကိုကျေးဇူးတင်ပါရေ။ နောက်ပြီးကေ ဂု အစိုင်အလာတခုဖြစ်လားအောင်အတွက် ကျနော်ရို့ National song အမျိုးသားသခြင်းကို သီဆိုပြီးဖွင့်လှစ်တေအတွက်ကြောင့် ပထမဆုံးသော ရခိုင်သမိုင်းမာ ပထမဆုံးအ ကြိမ်ဖြစ်ပါရေ။

ရခိုင်သမိုင်းမာ ပါဝင်ဆောင်ရွက်ကတ်တေ ဂုတက်ရောက်လာကတ်တေအားလုံးသူကိုလေ့ ကောင်းကောင်း ကျေးဇူးတင်ပါရေ။ ဂုဏ်လည်းယူပါရေ။ နောက်တခုကလေ့ ကျနော်ရို့မှာ ကျနော်ရို့နိုင်ငံအတွက် ကျဆုံးလားခ ကတ်တေ ဂေါင်းဆောင်တိ၊ လူငယ်တိအတွက်ကိုလေ့ အရိုအသေအလေး အမြတ်ထားပြီးကေ သတိတရနန့် ဂုဏ်ပြုအရိုအသေပီးကတ်တေအတွက်ကြောင့် ဆရာကြီးအနီနန့် အင်မတန်မှဝမ်းသာပါရေ။ ဂုဏ်လေ့ယူပါရေ။ ရခိုင်ဖြစ်ရစွာကိုလေ့ အချိန်မရွီး ဂုဏ်ယူပါရေ။

ယေတော့ခါ ကျနော်ရို့ ရခိုင်ဆိုတဲ့ဟာ(၃)မျိုးရှိရေ(နာမေအားဖြင့်)။ နံပါတ်(၁)က ရက္ခိတဆိုရေစကား။ ရက္ခိတ ဆိုတဲ့စကားဟာ ဗုဒ္ဒဘာသာကိုထိမ်းရေ၊ အမျိုးကိုထိမ်းရေ၊ ကိုယ့်ဘာသာစကား ကိုထိမ်းရေ။ ယင်းဟာကြောင့် ကိုယ့်အိမ်မာဟိရေ အသျှေတိကိုလေ့သော့ ရခိုင်စကားသင်ပီးကတ်ပါလို့ ဆရာကြီးကြုံရေအခါမှာ မိတ္တာရပ်ခံ ပါရေ။ ရခိုင်စကားလေ့တတ်တေ၊ ဗမာစကားလေ့တတ်တေ၊ မွန်စကားလေ့တတ်တေ၊ ကရင်စကားလေ့တတ် တေ၊ နော်ဝေးစကားလေ့တတ်တေ၊ အင်္ဂလိပ်စကားလေ့တတ်တေဆိုကေ အေအသျှေတိနောင်ရေးဟာ အင်မ တန်မှကျယ်ပြန့်ပါရေ။ အလင်းရောင်ကောင်းပါရေ။ ယင်းဟာက တခု။

နောက်တခုက ရခိုင်ဆိုစွာ အာရက္ခဆိုရေ စကားကလာရေအတွက်ကြောင့် အာရက္ခဆိုစွာက မိမိနိုင်ငံကို စောင့် ယှောက်တေ၊ ပတ်ဝန်းကျင်နိုင်ငံတိကိုလေ့ စောင့်ယှောက်တေလို့ အဓိပ္ပါယ်ရရေ။ ယင်းဟာကြောင့် အာရက္ခ ဆိုရေစကားကိုလေ့ ထိမ်းသိမ်းကတ်ဖို့အတွက် ကျနော်မိတ္တာရပ်ခံပါရေ။

နောက်တခုက ဘင်္ဂလားဒေ့(ချေ်)ကလူတိက ကျနော်ရို့ကို ”မော့ဂ်” လို့ခေါ်ရေ။ ”မော့(ဂ်) ”ဆိုစွာက မာဂဒ နိုင် ငံကလာရေ တိုင်းရင်းသားလို့ အဓိပ္ပါယ်ရရေ။ ယင်းမာဂဒ နိုင်ငံကလာရေ တိုင်းရင်းသားတိစွာ ဘုရားသျှင်မပွင့် ခင်လောက်ကပင် ကျနော်ရို့အင်ဒိုအာရီယန်လူမျိုးဖြစ်တေ ရခိုင်သားတိစွာ မာဂဒတိုင်းမာ နှစ်ပေါင်းများစွာ ဟိ လီကတ်ဖို့။ ယင်းဟာကြောင့် ဗုဒဘာသာကို ဘုရားသျှင်ပွင့်ပြီးပြီးချင်း ရခိုင်သားတိက ဦးစွာပဌမရရေလူမျိုးဖြစ် ပါရေ။ ယင်းဟာကိုလေ့သော့ ကျနော်ရို့အနီနန့် အများကြီးဂုဏ်ယူစရာဖြစ်ပါရေ။

နောက်တခုက အဟြိတောင်အာရှသမိုင်းမာ ဝေသာလီခေတ်ဆိုစွာဟိပါရေ။ ဝေသာလီခေတ်ဆိုစွာက နှစ်ပေါင်း(၁၀၀၀)ကျော်ကြာပါရေ။ အေဒီ (၃၃၀)လောက်ကစပြီးကေ ပုဂံခေတ် အနော်ရထာမင်း(၁၀၄၄)လောက်ထိ ရှည်လျားရေသက်တမ်းဟိရေ ဝေသာလီခေတ်ဆိုစွာ ထင်ရှားစွာဟိပါရေ။ ယင်းဟာအတွက်ကိုလည်း ပြန်လည် ဆန်းစစ်ပြီးကေ ဇာတိဇာတိ သုတေသနပြန်လုပ်သင့်ရေဆိုစွာကို လူငယ်တိကလေ့လာရပါဖို့။ ပေါ့ပေါ့တန်တန် နီလို့မဖြစ်ပါ။ ယေတော့ ယင်းကိစ္စနန့်ပတ်သက်လို့ ကျနော်တဆက်တည်းပြောချင်စွာက ရခိုင်ဆိုသည်မှာ ဇာ နိုင်ငံကိုဘဲရောက်ရောက်၊ ဇာနီရာကိုဘင်ရောက်ရောက် လူနည်းစုရာဖြစ်တေ။ ယင်းလူနည်းစုဖြစ်တေအတွက် ကြောင့် အရေးအကြီးဆုံးကဇာလဲဆိုကေ လူများထက်ပိုစည်းရုံးကတ်ရဖို့။ We have to be united more than any other peoples in the world because we are a minority, always and any kind of! ယင်းတခုမှာကြားချင်ရေ။ ရခိုင်လူမျိုးဟာ လူနည်းစုဖြစ်တေအတွက်ကြောင့် စည်းလုံးရဖို့၊ ညီညွတ်ရဖို့၊ သည်း ခံရဖို့။ ယင်းဟာတခု ဆရာကြီးမှာကြားချင်ရေ။

နောက်တခုက လူနည်းစုဖြစ်တေအတွက်ကြောင့် သူများထက်တော်အောင်လုပ်ရဖို့။ Quality peoples ဖြစ် အောင်လုပ်ရဖို့။ သူများထက်ပိုကြိုးစားကတ်ရဖို့။ ဗမာပြည်မှာသိရေအတိုင်းယာ ဗမာပြည်မာ ရခိုင်ဖြစ်တဲ့အ တွက်ကြောင့် ကျနော့်အနီနန့် တခါလေ့ပါမောက္ခဖြစ်လို့ အလားအလာမဟိ ပါ။ In Burma, I am not opportunity to be a professor, that’s exactly true but in America I can be professor and I am a professor. ယင်းကြောင့် အမေရိကန်ပိုင်နိုင်ငံတိ၊ နော်ဝေးပိုင်နိုင်ငံတိ၊ တခြားနိုင်ငံတိမှာ တန်းတူရည်တူအခွင့် အရေးပီးရေအတွက်ကြောင့် ငါရို့ရခိုင်သားချေ၊ ရခိုင်သူချေတိစွာ သူများထက်တော်အောင် Quality peoples ဖြစ်အောင်ကြိုးစားကတ်ပါ။ ဒါတခုကို ကျနော်ထပ်ပြီးကေ မှာပါရစီ။

နောက်တခုက သူများထက်တော်အောင်၊ Quality peoples အပြင် သူများထက်တော်အောင်၊ သူများထက်နာ မေကောင်းရအောင်။ ရခိုင်ပြည်မှာ သဇင်ပန်းဟာ နိုင်ငံတော်ပန်းဖြစ်တေ။ ယင်းနိုင်ငံတော်ပန်းဖြစ်တေပိုင် ငါရို့ ရခိုင်သူ၊ ရခိုင်သားတိက ဂုဏ်ယူနိုင်လောက်အောင် စန္ဒကူးနံသာပင်ဖြစ်အောင်လေ့ ကြိုးစားကတ်ပါ။ ယင်းပိုင် ယှောင် ကြိုးစားဖို့အတွက်၊ အောင်မြင်ဖို့အတွက် ကျနော်ရို့ ဗုဒ္ဓဘာသာကျမ်းဂန်မှာပါရေ ပဋ္ဌာန်းကျမ်းမာ အ ချက်(၄)ချက်ဖော်ပြထားရေ။

ယင်းအချက်(၄)ချက်က ဇာလဲဆိုလို့ရှိကေ ဆန္ဒဓိပဓိ၊ ဆန္ဒပြင်းထန်ရဖို့။ ဆန္ဒပြင်းထန်လို့ ရခိုင်တိဟာ နှစ် ပေါင်းသုံးထောင်လေးထောင်ခံနိုင်စွာ။ ကျနော်ရို့ဆန္ဒတိ ကောင်းကောင်းပြင်းထန်ရေ။ ဇာကြောင့်အေပိုင်ပြင်း ထန်လဲဆိုကေ ပင်လယ်ကမ်းမာနီရေ။ လီကလေ့ဝုန်းဝုန်းထနီရေ၊ မြစ်ရီကလေ့ တက်နီရေ။ ပင်လယ်လှိုင်းက လေ့တက်နီရေ။ တခါတခါ လီမုန်းတိုင်းကျရေ။ ယင်းကြားထဲက ရပ်တည်နိုင်ရေ နှစ်ပေါင်းသုံးထောင်လေး ထောင်ကာလဟာ အင်မတန်ကြံ့ခိုင်ရေစိတ်ဓါတ်ဟိစွာတော့ အင်မတန်ထင်ယှားရေ။ ယင်းဟာ ဆန္ဒဓိပတိပါ။ ကိုယ်ဖြစ်ချင်စွာကိုစွဲထားပါ မပျောက်စီကေ့။ ရခိုင်ပြည်လိုချင်ကေလေ့ ဆန္ဒကိုစွဲထားပါ၊ မပျောက်စီကေ့။ ပါ မောက္ခဖြစ်ချင်ကေလေ့ ဆန္ဒကိုစွဲထားပါ။ မပျောက်စီကေ့။ ယင်းဆန္ဒဓိပတိဆိုစွာက အေပဋ္ဌာန်းကျမ်းမာပါရေ ” ဆန္ဒဓိပတိ ဆန္ဒသမ္ပ ယုတ္တကာနံ ဓမ္မာနံ တံသမုဋ္ဌာနာနဉ္စ ရူပါနံ အဓိပဓိ ပစ္စယေန ပစ္စယော”။ ဆန္ဒဟာ ကောင်းအရေး ကြီးရေ။

နောက်တခုက ဇာအရေးကြီးလဲဆိုလို့ရှိဂေ ၀ီရိယာဓိပတိ။ ၀ီရိယဆိုစွာက Hard working ဖြစ်ရဖို့။ လူတ ယောက် Hard working ဖြစ်လာကေ လူတယောက်စွာ တော်လာရေ။ Hard working ဆိုစွာ ဇာလဲဆိုလို့ရှိ ဂေ ဆရာကြီးအတွိအကြုံအရ အခက်အခဲဆုံးက မှန်ကန်ရေကိစ္စ ၀ီရိယကို ထပ်ကာအလီလီ…ထပ်ကာအလီလီ မဖြစ်မချင်းလုပ်စွာဟာ ကောင်းကောင်းအခက်အခဲဖြစ်တေ။ လုပ်ကြည့်ကတ်ပါ။ ယင်းပိုင်ယှောင် ၀ီရိယာဓိပတိ ရှိရဖို့။ ဒါ နံပါတ်(၂)အချက်။

နံပါတ်(၃)အချက်က စိတ်တာဓိပတိ။ ” စိတ္တာဓိပဓိ စိတ္တသမ္ပယုတ္တကာနံ ဓမ္နာနံ တံသမုဌာနာနဉ္စ ရူပါနံ အဓိတိ ပစ္စယေန ပစ္စယော” စိတ်ဓါတ်ထက်သန်ရဖို့။ စိတ်ဓါတ်ထက်သန်ဖို့အတွက် ဘိန်း၊ ဘင်းကဇော် မသောက်ရ။ Drug မစွဲရ။ အရက်သေစာသောက်ကေလေ့ အပြင်းအထန်မသောက်ရ။ ယင်းပိုင်ယှောင်ဆိုလို့ရှိကေ စိတ်ဓါတ် ထက်သန်လို့ရရေ။

နောက်တခုက အချက်(၄)က ၀ိမံသာဓိပဓိ။ ပညာနန့် နှိုင်းယှဉ်ပြီး၊ ချင့်ချိန်ပြီးကေ လုပ်ရဖို့။ ပညာဆိုဟာက အ တန်းပညာကို ပြောဟာမဟုတ်။ အတန်းပညာဆိုစွာက သူ့အတန်းနန့်သူ တက်လာစွာ။ ၀ိမံသာဆိုရေပညာက ဘ၀အတွိအကြုံ၊ ဟြိအလားအလာ၊ ကိုယ့်ပါတ်ဝန်းကျင် အခြေအနေတိကိုအားလုံး စူးစမ်းပြီးကေ ကောင်းရေစွာ ကိုလုပ်စွာဖြစ်တေ။ ကောင်းရေကိစ္စကိုလုပ်တေဆိုစွာ ၀ိမံသာဓိပတိ။

ဆရာကြီးပြောချင်ရေအချက်က သုံးလေးငါးချက်လောက်ရာဟိရေ။ အကျဉ်းချုပ်ပြောရကေ ရခိုင်သားမည် သည်မာ တိုင်းပြည်တိုင်းမာ လူနည်းစုဖြစ်တေအတွက်ကြောင့် လူများထက်တော်အောင် ကြိုးစားကတ်ဖို့။ သူ များထက်စည်းရုံးအောင် ကြိုးစားကတ်ရဖို့။ နောက်တခုက ရခိုင်ရိုးမတောင်မာ သဇင်ပန်းတိဟာ လှိုင်လှိုင်ပွင့်နီ ရေပိုင် ဇာနိုင်ငံကိုရောက်ရောက် ရခိုင်သူ၊ ရခိုင်သားတိစွာ စန္ဒကူးနံသာပင်ဖြစ်အောင် ကြိုးစားကတ်ရဖို့။ ယင်းပိုင်ယှောင်ကြိုးစားဖို့အတွက် နံပါတ်(၁) ဆန္ဒဓိပတိကို ဦးစားပီးပါ။ နံပါတ်(၂) ၀ီရိယာဓိပဓိကို ဦးစားပီးပါ။ နံပါတ်(၃) စိတ်တာဓိပတိဖြစ်အောင် ဦးစားပီးပါ။ နံပါတ်(၄) ၀ိမံသာဓိပတိကို ဦးစားပီးပါ။ ယင်းပိုင်ယှောင်ဆိုကေ သုံးလေးငါးနှစ်အတွင်းမာ ရခိုင်ပြည်သူကိုစောင့်ယှောက်နိုင်ဖို့၊ ထိမ်းသိမ်းနိုင်ဖို့၊ အရောင်အ၀ါလေ့တောက်လာ ဖို့လို့ ဆရာကြီးအနီနန့် မိတ္တာလေ့ရပ်ခံရေ၊ ဆက်ပြီးကေလေ့ ကြိုးစားကတ်ဖို့တောင်းပန်ယင်း နိဂုံးချုပ်ပါရ စီ…… အားလုံး..၀မ်းသာပါရေ…..။

(လက်ခုပ်သံတိ xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx)

ဆရာကြီး၏ မိန့်ခွန်းကို မူရင်းအသံအတိုင်းဖြစ်အောင် ကြိုးစားရွီးထားပါရေ။ အမှားအယွင်း တခုခုပါခရေဆို ကေ ပြန်လို့ကူးယူဖော်ပြပီးရေ အကျွန်၏တာဝန်ရာဖြစ်ပါရေ။

အားလုံးကိုကျေးဇူးတင်ပါရေ……..။
ခိုင်ထွန်းထွန်း

lørdag 6. juni 2009

Crazy thinking!

တမတ်တန် စီမံကိန်း (သို့မဟုတ်) အရူးစိတ်ကူး


တရက်တရက်လာဂေ လုပ်စရာအလုပ်ကလေ့ ထထွေထထူးမဟိစွာနန့် စာရွီးဘနာ ဘလော့ခ်မာတင်ဖို့ စိုင်း စားမိရေ။ ခက်စွာက စာရွီးဖို့ကုန်ကြမ်းကတခုလေ့ ဂေါင်းထဲမာမဟိခါ ချရွီးလို့မကျနိုင်။ ယင်းပိုင်နန့်ပင် နောက် ဆုံးမာ ရိုးတောင်ခရင်းက ရခိုင်ပြည်သူတိ၊ ကဘာအရပ်ရပ်က ရခိုင်တိဘားကို စိတ်ကရောက်လားခရေ။ ရခိုင် တိဘားကို စိတ်ကူးရောက်လခရေဆိုစွာနန့် ပြဿနာက စလာဗျာ။ ပြဿနာဆိုလို့ တခြားသူပြဿနာမဟုတ် ပါ။ ကျွန်တော့ပြဿနာပါရာ၊ ဇာအကြောင်းအရာကို ရွီးရမှန်းမသိရေ ပြဿနာပါ။ အေပိုင် မနီနိုင်၊ မထိုင်နိုင် လက်မျောက်လို့လေ့ တချို့လူတိက ကျွန်တော့ဘလော့ခ်ထက်မာ နတ်တိ၊ သကြားမင်းတိပိုင် ကိုယ်ရောင် ဖျောက်ပြီးကေ လာဟန့်ကတ်စွာ တိမြင်ခါ ကြက်သီးဖဖြန်းထမိပါရေ (အချေကပင် ဆိတ်ဆီကြောက်တတ်လို့)။

စိတ်ထဲမာ ရွီးချင်ပြောချင်နီစွာက ပြဿနာတိနန့် ဒါရိုက်(direct)သက်ဆိုင်နီခါ အေဖြစ်ပျက်နီရေ ပြဿနာတိ ကို ဇာပိုင်ဖြေယှင်းကတ်ဖို့လဲ စိုင်းစားမိရေ။ ယင်းအကြောင်းအရာတိကို လေ့လာဖို့စာအုပ်စာတမ်းတိက လက် ထဲမာတခုလေ့မဟိ။ နောက်ဆုံး အင်တာနက်ထက်မာ တခြားလူမျိုးတိ၊ အဖွဲ့အစည်းတိမှာ ပဋ္ဋိပက္ခတိကို ဇာပိုင် ဖြေယှင်းကတ်လဲဆိုစွာကို လိုက်ဟြာယင်း လိုက်ဟြာယင်းနန့် စာကြောင်းချေတခုကို မျက်စိရောက်လားခပြီး ကေ ယင်းစာသားသျှေကြောင့်ပင် အစကရွီးဖို့ပြောဖို့ မှန်းထားခရေ ဦးတည်ရေလမ်းကြောင်း (direction) တိ ပါ စိကေပြောင်းပါလားရေလို့ ထင်လိုက်တေ….။ ယင်းစာသားချေကတော့ ………… “Remember always to put yourself in their position” ပါလတ်။ ရခိုင်ပိုင်ပြောရဖို့ဆိုကေဒေါ့ခါ ဆန့်ကျင်ဖက်၊ အတိုက်အခံဖြစ်နီရေ လူနီရာမာ ၀င်ပြီးကေခံစားခိုင်းစွာပါ။ ယင်း(ဆန့်ကျင်ဖက်)လူနီရာမှာ ငါရာဆိုဂေ၀ါ …. (ပဇောင်ပိုင် ခံစားရဖို့ လဲ) ဆိုစွာကို အမြဲတမ်းအတွက်ပေါ်ပါ”လတ်။ ယင်းစကားချေကျေးဇူးနန့် အေ ”တမတ်တန်စီမံကိန်း”ဖြစ် လာရ စွာပါ။

ရခိုင်သားတိအားလုံးစွာ ရခိုင်လူမျိုးနန့် ရခိုင်ပြည်ကိုချစ်ကတ်စွာ တယောက်လေ့ငြင်းလို့မရပါ။ ရခိုင်သားတိုင်း အဂင့်ဂင့်ချစ်ကတ်ပါရေ။ တခြားလူမျိုးတိထက် ပိုချစ်ကတ်တေလို့ ကျနော်ယုံပါရေ။ တခြားလူမျိုးတိကလေ့ ယင်းပိုင်ထင်ကတ်ပါရေ။ အေနိ တယောက်နန့်တယောက်၊ တဖွဲ့နန့်တဖွဲ့၊ တပါတီနန့်တပါတီဖြစ်နီကတ်တေ ပုဂ္ဂိုလ်ရေးအမြင်မယှင်းစွာတိ၊ အာဃာတတိ၊ အငြိုးတိယင်းပြဿနာတိအားလုံးစွာ အမျိုးကိုချစ်လို့ ဖြစ်နီဂတ် စွာပါယှင့်။ ကိုယ့်စီးပွါးရေး တ၀မ်းတခါးအတွက်ရာ ရခိုင်တိအားလုံးလုပ်နီကတ်ဖို့ဆိုကေ အေပြဿနာတိ ပေါ် လာစရာအကြောင်းမဟိပါ။ ရခိုင်ပြည်နန့် ရခိုင်လူမျိုးကိုရာ မချစ်ကတ်ဆိုကေ ရခိုင်ပြည်နန့် ရခိုင်လူမျိုးတိကြား မာ ဖြစ်ပျက်နီကတ်တေ ပြဿနာတိကို ကိုယ်နန့်မဆိုင်ရေပိုင် အားလုံးဥပေက္ခာပြုနီကတ်ပါဖို့နင်းရာ……။ ယယှင်းပြောရ ကေ ပိုတောင်စိတ်ချမ်းသာပြီးကေ အသက်ပိုရှည်ဖို့သိမ့် (ဟ..ဟ)…………။

ယပိုင်ဆိုကေ ယင်းလောက်ချစ်ကတ်ယင်းသားနင့် ဇာဖြစ်လို့အေပိုင်ပြဿနာတိ ဖြစ်နီကတ်ရလဲလို့ မီးစရာဟိ ပါရေ။ ဟုတ်ပါရေ။ ဖြစ်နီကတ်ရပါရေ။ အစွာဖြစ်လို့ ဒေပိုင်ယှောင်ဖြစ်နီကတ်ရလဲဆိုကေ ၀န်ပိနီလို့ပါ။ ကိုယ့် မာဟိနီရေအားက မြင်းကောင်ရေ တကောင်လောက်ရာဟိရေ။ ထမ်းရဖို့ဝန်က မြင်းကောင်ရေ ထောင်နန့် သောင်းနန့်ညီမျှရေ၀န်ဆိုခါ ရခိုင်သားတိစွာညောင်းလို့ ဖဖတ်သီနီကတ်ပါယာ။ ကြည့်လိုက်ကေ လုပ်စရာတိ ဂျေးယာဆိုခါ ဇာချင့်ကိုအယင်လုပ်လို့လုပ်ရမှန်းမသိ။ လုပ်လိုက်ပြန်ကေလေ့ ”နှမ်းတစိနန့် ဆီမဖြစ်”ဆိုပိုင် ကျနီပါရေ။ ယေခါ လုပ်နီကတ်ကိုင်နီကတ်တေလူတိစွာ လုပ်ယင်းကိုင်ယင်းနန့် ယင်းဝန်စွာ ဂေါင်းထက်ကိုတ ရက်ထက်တရက်ပိလာပနာ စိတ်ပိုင်းဆိုင်ရာ၊ ရုပ်ပိုင်းဆိုင်ရာတိကအစ ဖိစီးလာပါရေ။ လူဆိုစွာ စိတ်ချမ်းသာ ကိုယ်ချမ်းသာနန့် အီးလို့နီရရေခါ ဂေါင်းကိုခြီနန့်ကျောက်ပစ်ကေလေ့ ရယ်ချင်ရယ်နီကတ်ပါဖို့။ အဲ…ညောင်း လာရေ၊ ပင်ပမ်းလာရေအချိန်မှာ ကိုယ့်နားမာ တခြားတယောက် လီပပြင်းရှူပလိုက်ကေတောင် ”လီကိုယင်း လောက်ပင် ပပြင်းရှူစရာလိုလား” ဆိုရေအကြည့်မျိုးနန့် ကြည့်တတ်ကတ်စွာ လူ့သဘာဝပါ။ ဂုကျနော်ရို့ထဲမှာ ဖြစ်ပျက်နီကတ်တေပြဿနာတိစွာလေ့ ယင်းအတိုင်းပါရာ။

အေနီရာမှာ ကျနော်ရို့အားလုံးက ဇာနန့်လားတူနီပိုင်တွိလဲဆိုကေ နှစ်ပေါင်း (၂၀၀)ကျော် ရီထဲမှာမြုပ်နီရေ သဖောင်္တစင်းကို နှိုးပနာချက်ချင်းမောင်းဖို့ကြိုးစားနီကတ်တေလူတိနန့် လားတူပါရေ။ လက်ဟိအခြေအနေမှာ ယင်းသင်္ဖောစွာ ပင်လယ်ကြမ်းပြင်အောက် ကျုပ်တောထဲကမထွက်နိုင်သိမ့်။ ယင်းသင်္ဖောပျက်ကို ပြန်အသက်
ဝင်လာစီချင်ရေဇောနန့် ဖော်ဖို့ကြိုးစားနီကတ်ကေလေ့ တယောက်တပေါက် ဘြန်းစီးကာရဖြစ်နီလို့ မအောင် မြင်ပါ။ မအောင်မြင်ရေအပြင် တရက်ထက်တရက် ပိုတောင်မြုပ်လာနီပါရေ။ စနစ်တကျ စီမံညွှန်ကြားနိုင်ရေ ပုဂ္ဂိုလ်မျိုးတိ မဟိပါသိမ့်။ ဗရမ်းဗရာ မောင်းဖို့ကြိုးစားနီကတ်ကေလေ့သင်္ဖောက ရီပြင်ကိုလေ့ မရောက်သိမ့်ပိုင် စက်တိကလေ့ သံချီးကိုက်နီတုန်းသိမ့်၊ ကပ္ပတိန်လေ့မဟိသိမ့်၊ သင်္ဖောသားလေ့မဟိသိမ့်၊ ဆီလေ့မဟိသိမ့်…. ကြည့်လိုက်ကေ တခုလေ့အဆင်သင့်မဖြစ်သိမ့်။ ယင်းပိုင်ကြိုးစားယင်း၊ ရုန်းယင်းကန်ယင်းနန့် အားကုန်လာ ကတ်တေခါ တချို့ကလေ့ စိတ်ကုန်လာကတ်တေစွာတိဟိရေပိုင် တချို့ကလေ့ ညောင်းအားကြီးလို့ ဘေးနား ကလူ လီပပြင်းရှူကေတောင် အပြစ်မြင်လာကတ်တေ အခြေအနေပါရာ။ လက်မလျှော့ကတ်ပါကေ့။ ကျနော်ရို့ ကျုပ်တောထဲက ကြမ်းပြင်ကိုအယင်ရောက်အောင်လုပ်ကတ်ပါမေ။ ကြမ်းပြင်ကတဆင့် ရီထက်၊ ရီထက်ကတ ဆင့် ဒေါက်ကျင်း၊ ဒေါက်ချပြီးကေ ရခိုင်ပြည်ကို အလံလွှင့်လို့မောင်းရေနိ အညောင်းတိ အားလုံးပြေလား ပြီးကေ ယင်းအချိန်ခါ သင်္ဖောထက်မှာ တယောက်ကိုတယောက် ဂေါင်းကိုခထောက်နန့်ပင်ကျောက်ကျောက်၊ နောက်ကုန်းကို တန်းတောင် နန့်ပင်ထုထု မပြစ်မမြင်ဘဲ လိုင်ဖင်းဖက်ဘျာလ် အိမ်ပြန်ကတ်ဖို့နင်းရာ………..။

သင်္ဖောမြုပ်တေနိကပင် ပြန်ဖော်ဖို့ကြိုးစားခကတ်စွာ သင်္ဖောကအထက်ကိုမတက်လာရေအပြင် တရက်ထက် တရက် ပိုမြုပ်လာနီစွာ လူတိုင်းအသိဖြစ်ပါရေ။ ယေဇူးနန့် ဒေနည်းအတိုင်းဆက်ဖော်နီလို့ အလုပ်မဖြစ်ပါယာ။ ပထမဆုံးကြိုးစားရဖို့အလုပ်က ကဘာအရပ်ရပ်မာရောက်နီကတ်တေ ရခိုင်သားတိပါးက ဖေ့သျှာကောက်ရပါ ဖို့။ ဖေ့သျှာကောက်တေနီရာမှာ အဟြိဟြိကျအောင် စံတခုသတ်မှတ်ရပါဖို့။ ယင်းစံက ပဇောင်ပိုင်ဖြစ်သင့်လဲ ဆိုကေ နိုင်ငံတိုင်းမှာ အလုပ်သမားတိအတွက် အနိမ့်ဆုံး(တနာရီ/တရက်)လုပ်အားခဖေ့သျှာသတ်မှတ်ထားစွာ တိဟိပါရေ။ ယင်းချင့်ကိုမူတည်ပြီးနာ ဇာနှစ်ရာခိုင်နှုန်းကောက်ခံသင့်လဲဆိုစွာကို အများသဖောတူဆုံးဖြတ် ကတ်ရပါဖို့။ ယင်းဖေ့သျှာတိကိုကောက်ခံဖို့၊ စီမံခန့်ခွဲဖို့၊ သုံးစွဲဖို့အတွက် ရခိုင်အများစု လေးစားယုံကြည်ရ ရေ၊ အားကိုးအားထားပြုရရေ အဖွဲ့အစည်းတခု (သို့) လူတစု လိုပါရေ။

ဒုတိယအဆင့်မှာ အထက်မှာကျနော်ပြောခရေပိုင် လူအမျိုးမျိုး၊ စိတ်ဝင်စားမှုအမျိုးမျိုးဟိနီကတ်တေအတွက် တူရေအုပ်စုတိကို တစုစီခွဲထုတ်ကတ်ရပါဖို့။ ဥပမာ စစ်ရေး၊ ပညာရေး၊ စီးပွါးရေ၊ ကျမ္မာရေး၊ လူမှု့ရေး၊ ရခိုင့်သ မိုင်းဆိုင်ရာယိုင်ကျေးမှု့တိကို ထိမ်းသိမ်းကာကွယ်ရေး၊ သတင်းနန့်မီဒီယာ အစဟိရေ ယင်းပိုင်အုပ်စုတူတိကို တခုချင်းစီခွဲထုတ်ကတ်ရပါဖို့။ စစ်ရေးဆိုကေ စစ်ရေးကို စိတ်ဝင်စားရေလူတိ တစုစုပနာ စစ်ရေးကိုဇောက်ချပ နာလုပ် (ဖြစ်နိုင်ကေ အမျိုးသားတပ်မတော် တရပ်ပေါ်အောင်ထိလုပ်)။ မီဒီယာကို စိတ်ဝင်စားရေလူတိကလေ့ ဖြစ်နိုင်ကေ ရခိုင်အသံလွှင့်ဌာနတခု ရုပ်မြင်သံကြားတခုပေါ်အောင်ထိလုပ်။ ပညာရေးကို စိတ်ဝင်စားရေလူတိ ကလေ့ ပြည်တွင်း၊ ပြည်ပအားလုံးပါဝင်နိုင်အောင် အစုအဖွဲ့တခုဖွဲ့ပနာ ပညာရေးနန့်သက်ဆိုင်ရေစွာတိကို လုပ်။ ဂုနား ကပြောခရေ တခြားတခြား အဖွဲ့တိလေ့ ယပိုင်အစုခွဲပနာလုပ်လားကတ်ဖို့ဆိုကေ အခြေအနေ တမျိုးပြောင်းကိုပြောင်းလာပါဖို့။

ဒေ အစုအဖွဲ့တိ အလုပ်လုပ်နိုင်ဖို့အတွက် ဖေ့သျှာကို ပထမအဆင့်မှာ တင်ပြခရေ အဖွဲ့အစည်းတခု(သို့)လူတစုက အခြေအနေကိုကြည့်ပနာ ဇာနီရာမှာဇာလောက်သုံးသင့်ရေဆိုစွာကို စီမံခန့်ခွဲ ပီးရပါဖို့။ အေနီရာမာ တခုထပ်ပြီးကေ သတိထားရဖို့စွာက အေယှင့်တိကိုလုပ်တေကိုင်ရေနီရာမာ Volunteer (စေတနာ့ဝန်ထမ်း)ပုံစံ မျိုးနန့် လားလို့ကောင်းအလုပ်မဖြစ်ပါယာ….။ စေတနာ့ဝန်ထမ်းက အားဂေ လုပ်တေ….မအားဂေ မလုပ်ဆိုခါ များသောအားဖြင့် ကဂေါင်းလျော့ရိလျော့ရဲဖြစ်တေ။ ထင်သလောက် ခရီးမရောက်ပါ။

ဂနိ ကဘာကြီးမာ အောင်မြင်ကျော်ကြားနီကတ်တေလူတိကိုကြည့်ကြည့်၊ အဖွဲ့အစည်းတိကိုကြည့်ကြည့်၊ နိုင်ငံ တိကိုပင်ကြည့်ကြည့် အားလုံးကိုစနစ်တကျနန့် စီမံခန့်ခွဲလာကတ်လို့ အောင်မြင်လာဂတ်စွာဂျေးပါယာ။ ဗရမ်း ဗရာနန့် အောင်မြင်လာကတ်စွာမဟုတ်ပါ။ ယင်းဇူးနန့် ကျနော်ရို့ရခိုင်တိမာလေ့ ဇာပင်လုပ်လုပ် အားလုံးကို စနစ်တကျစီမံခန့်ခွဲတတ်တေအကျင့်ဟိဖို့နန့် လက်တွိအ ကောင်အထည်ဖော်ကတ်ရဖို့အချိန်ကျနီပါယာ……။ ယင်းပိုင် မလုပ်နိုင်သမျှကာလပတ်လုံး ဇာပင်လုပ်လုပ် ”ကြက်ဖင်မာ ရီဆုံးဆုံးလို့” ဖြစ်နီပါဖို့။ အလုပ်လုပ်ကတ် တေ ကိုင်ကတ်တေနီရာတိမာလေ့ တယောက်ကိုတယောက်၊ တဖွဲ့ကိုတဖွဲ့ အပြစ်တင်စွာတိ၊ စိတ်ပျက်လက် လျှော့လားစွာတိက အတတ်နိုင်ဆုံး ရှောင်ယှားနိုင်ကတ်အောင် ”Remember always to put yourself in their position” ဆိုရေ စကားချေကို အေစာနန့်တတူ အားလုံးကိုမျှဝီ ပီးလိုက်ပါယင့်……..။

ခိုင်ထွန်းထွန်း