søndag 30. september 2012

အကျွန်နန့် အရက်

အမှန်တရားဆိုစွာ ဖုံးထား၊ ၀ှတ်ထားလို့ရရေ အမျိုးမဟုတ်။ ရကေလေ့ တချက်ချေရာ။ နောက်တခုက သူများကိုရာ လိမ်လို့ရချင်ကေ ရဖို့။ ကိုယ့်စွာကိုယ် တခါလေ့ လိမ်လို့မရ။ အကျွန်ပဌမဆုံး အရက်ကိုစသောက်ဖူးစွာ (၄)တန်းနှစ်ကထင်ရေ။ သင်္ကြန်တရက်မာ အစ်ကိုဝမ်းကွဲတိ တိုက်လို့အရက်ကို ပဌမဆုံးစသောက်ဖူးရေ။ နောက် (၁၀)တန်းနှစ်လောက်မာ အပေါင်းအသင်းတိနန့် ခိုးကြောင်ခိုးဝှတ် သောက်တတ်လာရေ။ ကြိုတင် အချိန်းအချက်လုပ်ဘနာ အိမ်ကမသိအောင် ဆိုင်တိမာ ခိုးသောက်ဖို့တတ်လာရေ။ အရက်သောက်မ လူရာဝင်ရေ၊ အပေါင်းအသင်းဆန့်ရေ၊ ခေတ်မှီရေဆိုရေ အတွေးအခေါ်တိက ခေတ်ရီစီကြောင်းနန့်အညီ ၀င်ပါလတ်တေ။ ပတ်ဝန်းကျင်မာလေ့ ယင်းအတိုင်းဖြစ်နီရေ။ ယင်းချင့်ထက် တဆင့်ပိုတက်လာစွာက အိမ်ကထွက်လာရေ၊ ရခိုင်ပြည်ကထွက်လာရေနောက်ပိုင်းမာ ပိုဆိုးလာရေ။ ဘ၀မာ ဖြစ်ချင်ခရေစွာတခုကို မဖြစ်နိုင်ယာလို့ သိလိုက်ရရေအချိန်(၁၉၉၅ လောက်မာ) ‘ဘ၀မာ ဖြစ်ချင်စွာမဖြစ်ကေ….ဖြစ်ချင်စွာ ဖြစ်လီဖိ..’ ဆိုဘနာ ဘ၀ကို အလိဇီထိုးဘနာ အလျှော့ပီးပလိုက်တေပိုင်ဖြစ်လားခါ အရက်သောက်တေအရှိန်က ဒီဂရီအမြင့်ဆုံးကိုရောက်လားရေ။ ပြောဆိုဆုံးမဖို့လူမဟိ။ ကိုယ်က အဖော်မညှိကေ သူကအဖော်လာညှိရေ..သူမလာကေ ကိုယ်လားခေါ်ရေ။ မိတ်ဆွေအပေါင်းအသင်းတိနန့် ယင်းပိုင် ဘတပြန် ကျားတပြန် စိတ်ဟိတိုင်း လွတ်ချင်ပိုင်လွတ်ပလိုက်စွာ နောက်ဆုံးအရက်သမားဘ၀ ရောက်လားခရေ။ မသောက်ရကေ လက်တိခြီတိ တုန်ရေအဆင့်ထိရောက်လားရေ။ မိတ်ဆွေအပေါင်းအသင်းတိကြားမာ ယစ်ဖွေ ဆိုရေအကြည့်မျိုးတိနန့် အကြည့်ခံရရေ။ ရခိုင်မိတ်ဆွေတိက ယူကျုံးမရ၊ အားမရရေ လီသံတိနန့် တွိကေတွိရေနီရာမာ ပြောဆိုဆုံးကတ်တေ။ ယကေလေ့ သူရို့ဆုံးမစွာတိ ဘယ်ဖက်နားက၀င်ကေ ညာဖက်နားက ပြန်ထွက်လားခရေ။ ယင်းပိုင်သောက်ပါလတ်တေ အခြေအနေက ပတ်ဝန်းကျင်အသစ်၊ နီရာအသစ်တခုကိုရောက်ပါလတ်တေ အချိန်မာ အတုယူဖို့ကောင်းရေအကျင့်ချေတခုကို ယင်းသူရို့တိဘားမာ ဘွင်းခနဲတွိလိုက်ရရေ။ ဒေနီရာသစ်ကိုရောက်တေ အချိန်ထိ အကျွန်စွာ ညဥ့်တိုင်းဝီစကီသောက်တေ။ တရက်ကို ပျမ်းမျှဝီစကီ တအာဒါလောက် သောက်တေ။ ကျောင်းတက်ကေလေ့ သောက်တေ။ အလုပ်လုပ်ကေလေ့ သောက်တေ။ ပျက်တေနိလို့မဟိ။ ကျောင်းတက်၊ ကျောင်းကပြန်ကေ အရက်ဆိုင်ကိုဝင်၊ ၀ီစကီ တအာဒါ (သို့) တပုလင်းဝယ်၊ အိမ်ပြန်ရောက်ကေ ကျောင်းကပီးရေအိမ်စာတိလုပ်ပြီးစွာနန့် အသောက်လုပ်ငန်းစရေ။ ယင်းပိုင်နိန့်စိုင်နန့်အမျှသောက်လာရေ ယစ်ဖွေ ၂၀၁၀ခုနှစ်မာ လုံးဝစတိုင်လ်ပြောင်းပလိုက်တေ။ တနည်းပြောရကေ သောက်နှုန်း တပါတ်မာ (၇)ရက်သောက်နီစွာက (၂)ရက်ထိ လျှော့ချပလိုက်တေ။ ဒေချင့်စွာ အဂုနားက အကျွန်ပြောခရေ ကျနော့်လက်ဟိပါတ်ဝန်းကျင်က အတုခိုးယူလိုက်စွာ။ အနောက်တိုင်း ယိုဉ်ကျေးမှုလို့ ပြောကေလေ့ရရေ။ ဒေသူရို့တိစွာ အလုပ်ကိုလုပ်တေအချိန်မာ အလုပ်ကိုကြိုးစားပြီးကေ နားရေအချိန်မာလေ့ တန်အောင်စည်းစိမ်ခံစားကတ်တေ။ ဇိမ်ခံကတ်တေ။ တနင်္လာကပင် သောက်ကြာနိန့်ထိ အလုပ်လုပ်တေ။ သောက်ကြာနိန့်ညစာသားရောက်တေ၊ အလုပ်ချိန်ပြီးယာဆိုစွာနန့် ကိုယ်ပိုင်အချိန်မာ လလွတ်လလပ်ဇိမ်ခံရေ။ အရက်သောက်ကတ်တေ၊ ၀ိုင်သောက်ကတ်တေ၊ ဘီယာသောက်ကတ်တေ။ ကိုယ်ကြိုက်စွာကိုယ်သောက်ကတ်တေ။ အလုပ်လုပ်တေရက်တိမာ မသောက်ကတ်။ အကျွန်ယင်းအကျင့်ကို အတုခိုးယူလိုက်တေ။ ယင်းဇူးနန့် အကျွန်ဖေ့သာ ဇာလောက်သက်လာလားလဲဆိုကေ တရက်ကို (၁၀၀) နှုန်းနန့်တွက်ကေတောင် တလအတွက် (၃၀၀၀) သက်သာလားရေ။ ကိုယ့်စွာကိုယ် ယုံကြည်မှု ပိုရလားရေ။ ကိုယ့်လူမျိုးတိအတွက် ကောင်းရာကောင်းကြောင်း လုပ်ပီး၊ ပြောပီး၊ ရွီးပီးနိုင်ဖို့ ပိုအချိန်ရလာရေ။ အရက်ကြိုက်တတ်တေ၊ အရက်သောက်နီရေလူတယောက်ကို လုံးဝမသောက်ကေ့လို့ ပြောစွာရေ လက်တွိမကျရေပိုင် ဖြစ်လေ့ကောင်းမဖြစ်နိုင်။ အခန့်မသင့်ကေ အဆဲတောင်ခံရနိုင်ရေ။ ယင်းဇူးနန့် အကျွန်က မသောက်ကေ့လို့မပြော။ သောက်ကတ်၊ အကျွန်သောက်တေပိုင် သောက်ကတ်၊ အလုပ်လုပ်တေနိတိမာ မသောက်ကေ့၊ အလုပ်အားရေနိန့်တိမာ အီးလို့ပပျော်ပပါး သောက်ကတ်လို့ အကြံပြုချင်ရေ။ အကျွန်ပြောရေ အစီအစိုင်ကို ရခိုင်သားထဲက တယောက်လိုက်နာကေ တယောက်အတွက် အကျိုးဟိရေ။ ရခိုင်သားတိုင်းလိုက်နာကေ ရခိုင်တပြည်လုံးအတွက် အကျိုးဟိဖို့။ ယကေလေ့ အထက်ဆုံးမာ အကျွန်ပြောခရေပိုင် “ လူများကို လိမ်လို့ရရေ၊ ကိုယ့်စွာကိုယ် မလိမ်ကတ်ပါကေ့” Free4waddy

Ingen kommentarer: