ငါ့အမြင်

ရခိုင့်တော်လှန်ရေး အဓိပ္ပါယ်ဖွင့်ဆိုချက်။

ဂနိ ဗမာပြည်မာဖြစ်နီဂတ်တေ စစ်ပွဲတိကို ဗမာအပါအ၀င် တခြားတိုင်းရင်းသားတိနန့် နိုင်ငံတကာက ပြည်တွင်းစစ်ဆိုဘနာ ကင်းပွန်းတပ်ပြောဆိုနီဂတ်တေ။ ရခိုင်ရို့တိအနီနန့် တော်လှန်ရေးကို ယှင်းလင်းပြတ်သားစွာ အဓိပ္ပါယ်ဖွင့်ဆိုရကေ ရခိုင်ရို့အနီနန့် မတရားကျူးကျော်တိုက်ခိုက်ခံလိုက်ရလို့ ဆုံးယှူံးလားရေအချုပ်အခြာအာဏာကို ပြန်လည်ရယူဖို့တိုက်ခိုက်နီဂတ်စွာဖြစ်တေအတွက် ရခိုင်ရို့တိအတွက် ဒေချင့်စွာပြည်တွင်းစစ်မဟုတ်။ ပြည်ပက မတရားသဖြင့်ကျူးကျော်လာရေစစ်ကို ပြန်လို့တော်လှန်နီဂတ်စွာဖြစ်တေအတွက်နန့် “ပြည်ပ မတရားကျူးကျော်စစ်” ရာဖြစ်တေ။

ရန်သူနယ်ချဲ့ကောင်တိကိုအောင်မြင်နိုင်ရေနည်းလမ်း....

မတရားသဖြင့်ကျူးကျော်အနိုင်ကျင့်နီဂတ်တေအကောင်တိကို ပြန်လို့မောင်းထုတ်နိုင်ဖို့အတွက် အခြေခံအကျဆုံးနန့် အလိုအပ်ဆုံးက ပြည်သူတိစည်းလုံးညီညွတ်မှုဖြစ်တေ။ ဒေအချက်ကို အားလုံးရခိုင်သူ၊ ရခိုင်သားတိကလေ့ လက်ခံထားဂတ်တေ။ တော်လှန်ရေးတရပ်အောင်မြင်ဖို့အတွက် ရည်ရွယ်ချက်၊ ပန်းတိုင်ဆိုစွာတခုရာဟိသင့်ကေလေ့ အကျွန်ရို့လူမျိုးတိကြားထဲမာ ၀ိဝါဒကွဲနီဂတ်စွာတိ ဟိနီသိမ့်ရေ။ ကိုယ်ရို့ ဇာလိုချင်လဲဆိုစွာ မသဲကွဲဖြစ်နီသိမ့်ရေလို့ သုံးသပ်လို့ရရေ။

ဇာဖြစ်လို့ ဒေပိုင်သုံးသပ်လဲဆိုဂေ တချို့က ဒီမိုကရေစီ၊ ဖက်ဒရယ် ဖြစ်နီပြီးကေ တချို့က လွတ်လပ်ရေး ဆိုဘနာ အပိုင်း(၂)ပိုင်း ကွဲနီလို့ဖြစ်တေ။ ဒေ အခြီခံကွဲပြားရေအမြင် တထပ်တည်းကျအောင် မလုပ်နိုင်သရွိ ဟြိကိုဆက်လို့လားဖို့ဆိုစွာ မလွယ်။ ကိုယ်ရို့ ဇာကိုလိုချင်ရေလဲဆိုစွာကို ကိုယ်ရို့စွာကိုယ်ရို့တောင် ပြတ်ပြတ်သားသားမစိုင်းစား၊ မဆုံးဖြတ်နိုင်ဂတ်ကေ လက်တွိမာဖြစ်လာဖို့ဆိုစွာ ကဂေါင်းအခက်အခဲဟိရေ။ နှစ်ပေါင်း(၂၀၀)ကျော် ၉၆ ပါးရောဂါနန့် မချိဖြစ်နီရေလူတယောက်ကို ခြီနန့်လက်ကို ကိုင်ဘနာတယောက်တဖက် ဆွဲနီဂတ်ကေ နောက်ဆုံးမာ ယင်းလူနာသီကျလားစွာရာ အဖတ်တင်ဖို့။ ယင်းဇူးနန့် ငရို့ဇာလမ်းကိုလားဂတ်ဖို့လဲဆိုစွာကို ပပီပပြင်ရွီးဂတ်ရဖို့ အချိန်ကျနီယာ။

ညီညွတ်ရေးကို ဇာပိုင်တည်ဆောက်ဖို့လဲ -

လူမှု့ရေးအဖွဲ့အစည်းပင်ဖြစ်ဖြစ်၊ ဘာသာရေးအဖွဲ့အစည်းဘင်ဖြစ်ဖြစ်၊ ပါတီအဖွဲ့အစည်းဘင်ဖြစ်ဖြစ် လူတိကိုအခြီခံဘနာဖွဲ့ထားဂတ်စွာဖြစ်တေ။ ယင်းလူတိစွာ ပြည်သူပြည်သားတိဖြစ်တေ။ ငရို့တိဖြစ်တေ။ ပြည်သူပြည်သားတိ ပူးပေါင်းပါဝင်ဆောင်ရွက်စွာ မဟိဘဲနန့် ယင်းအဖွဲ့အစည်းတိ၊ ပါတီတိဆိုစွာ ရပ်တည်လို့မရ။ ရရေဆိုဂေလေ့ နာမေခံသက်သက်လောက်ရာဟိဖို့။

အကျွန်အထက်က အပိုဒ်ချေကို ဇာကြောင့်ပြောရလဲဆိုဂေ အကျွန်ရို့တိအားလုံး မျှော်လင့်တောင့်တနီခဂတ်တေ အမျိုးသားစည်းလုံးညီညွတ်မှု ဆိုရေအကြောင်းကို ပြောချင်လို့။ အမျိုးသားစည်းလုံးညီညွတ်ဖို့အတွက် ပါတီတိကိုတပေါင်းတစည်းတည်းဖြစ်အောင် ကြိုးစားခဂတ်တေ။ ယကေလေ့ ထင်ရေပိုင်ဖြစ်မလာ။ ဇာကြောင့်လဲလို့ ပြန်သုံးသပ်ရသလောက်ပြောရဂေ
(၁) အတ္တတိကြောင့်။
(၂) ပြည်သူပြည်သားတိ ရင်ထဲကလာရေ စစ်မှန်ရေစည်းလုံးမှုမဟုတ်လို့၊ ပြည်သူ့ဆန္ဒကို အခြီမခံခလို့၊ (NGOs တိအလိုကျ လမစိဘဲနန့် မွီးလာရေ ပေါင်းစည်းရေးဖြစ်လို့)။ ပေါင်းစည်းရေး၊ ညီညွတ်ရေးဆိုစွာ နာမေသက်သက်လောက်ရာဟိခရေ။ တခုလေ့ အလုပ်ဖြစ်မလာ။ ဒေပိုင်ဖြစ်ပျက်ခစွာတိကို “ပြီးလားခစွာ ပြီးပါလီဖိ….”ဆိုဘနာ မြတ်ခိုင်ကျော်သခြင်းပိုင် အော်ပစ်လို့မရ။ ဒေချင့်တိက သင်္ခန်းစာကိုယူဘနာ အရှုံးထဲက အမြတ်ကို ရအောင်လုပ်တတ်ဖို့လိုရေ။

အကျွန်ရို့အားလုံးပါတီတိ၊ တပ်မတော်တိအားလုံး တစုတစည်းတည်းနန့် ရန်သူကို တော်လှန်ဖို့ဆိုဘနာမျှော်လင့်နီခဂတ်စွာ ဆယ်စုနှစ်တိကျော်ပါလတ်ယာ။ ဂုထိဖြစ်မလာသိမ့်။ နည်းလမ်းဟောင်းတိနန့် မအောင်မြင်ခဂေ နည်းလမ်းသစ်တိကို အားလုံးဝိုင်းရှာကတ်ရဖို့။ မဖြစ်ကေ ဖြစ်နိုင်ဖို့နည်းကိုဟြာကြံဂတ်ရဖို့။ မဖြစ်နိုင်ရေနည်းလမ်းတိ၊ ဂြာအိုကျနီရေအတွေးအခေါ်တိနန့် ထပ်ကာတလဲလဲ အချိန်ကုန်ခံဘနာ လုပ်နီဖို့အစား အဖြစ်နိုင်ဆုံးနည်းလမ်းတိကို ဟြာကြံဂတ်ရဖို့စွာ အကျွန်ရို့လူငယ်ချေတိ တာဝန်ဖြစ်ပါလတ်တေ။ ဖြစ်နိုင်ဖို့မဟုတ်ထင်ဘနာ မလုပ်ဘဲထိုင်နီဖို့တပ်စား ထဘနာလုပ်ကြည့်လိုက်စွာက ပိုအကျိုးဟိရေ။ နောက်ဆုံး ထင်ထားရေပိုင် ဖြစ်မလာခဆိုဂေတောင် အနည်းဆုံး ဇာဖြစ်လို့ မဖြစ်ခလဲဆိုစွာချေတခုကို အတွိအကြုံတခုရလိုက်ဖို့။

ရခိုင်လူမျိုးတိုင်း ရခိုင်အဖွဲ့အစည်းတိမာ အဖွဲ့ဝင်ဖြစ်သင့်ရေ။

ပြည်သူတိ အောက်ခြီမာ အယင်စုစည်းအောင်လုပ်ကတ်ရဖို့။ ယင်းပိုင်စုစည်းရေနီရာမာ အယင် ဦးတည်ချက်၊ ရည်ရွယ်ချက်တူရေ အဖွဲ့ချေတိအချင်းချင်း ပေါင်းစည်းလာအောင်လုပ်ကတ်ရဖို့။ ဦးတည်ချက်၊ ရည်ရွယ်ချက်မတူဘဲ ချက်ချင်းဗြုန်းစားကြီး လိုင်းပူးမိကေ ရှော့(ခ်)ဖြစ်တတ်တေ။ လက်ဟိ ရခိုင်လူမှုအသိုင်းအ၀ိုင်းမာ အကြမ်းဖျင်း (၂)မျိုးခွဲလို့ရရေလို့မြင်ရေ။ ပဌမ တခုက တော်လှန်ရေးကို စိတ်အားသန်ရေလူတိနန့် နောက်တဖွဲ့က လူမှုရေး၊ ပညာရေး၊ ဘာသာရေးတိကို အားသန်ရေအဖွဲ့(၂) ဖွဲ့ တွိရရေ။ ဒေ လိုင်းကြီး (၂)လိုင်းရာ အပြန်အလှန် ဆက်စပ်မှု့တိနန့် ဟန်ချက်ညီညီချီတက်နိုင်ဂေ အကျွန်ရို့လိုချင်ငတ်မွတ်နီရေအဖြေရဖို့ ကျကျူးလလွန် နှစ်(၅၀)ယာ။

ရခိုင့်တော်လှန်ရေးပါတီတိ၊ နိုင်ငံရေးပါတီတိစွာ အပင်တပင်၏ ပင်စည်၊ အကိုင်းအခက်၊ အရွက်၊ အသီး၊ အပွင့်တိနန့်တူပြီးကေ အကျွန်ရို့ပြည်သူတိစွာ ယင်းအပင်၏ အမြစ်တိနန့်တူရေ။ အမြစ်တိ မခိုင်ဘဲနန့် ယင်းအပင် ဇာလောက်သန်သန်၊ ဇာလောက်လှလှ မခိုင်မြဲနိုင်။ လီတချက်ချေတိုက်စွာနန့် ဘုန်းခနဲလဲလားလီဖို့စွာ သေချာရေ။ ယင်းအတွက်နန့် အမြစ်နန့်တူရေ အကျွန်ရို့အားလုံး ခိုင်မာနီဖို့လိုအပ်တေ။ ရခိုင်မသားတိုင်းမာ တာဝန်ဟိရေ။ ပစကလေ့ ပြောနီဂတ်တေပိုင် လက်ကလေ့လက်တွိလုပ်ဖို့လိုအပ်ပါလတ်တေ။ ဒေနိအချိန်ခါ ရခိုင်သူ၊ ရခိုင်သားတိုင်း ကိုယ်အားသန်ရေလိုင်း တလိုင်းလိုင်းမာ အဖွဲ့ဝင်ဖြစ်နီသင့်ရေ။

လူတယောက်ကို မကြေနပ်လို့ ယင်းအဖွဲ့မာ ငါမလုပ်ဆိုရေ စိတ်ဓါတ်မျိုးတိကို အမြစ်ကပင် တူးပလိုက်ကတ်ရဖို့ယာ။ မျှော့တိကို ချရီပြန်ပိုင် ပြန်ပလိုက်ဖိ။ ယင်းလူကို မကြေနပ်လို့ ငါမလုပ်ဆိုစွာရေ ဇာနန့်လားတူလဲဆိုဂေ ယင်းသူကို မင်းလုပ်ချင်စွာလုပ်လီဖိဆိုဘနာ လုပ်ခွင့်ပီးလိုက်စွာနန့် တူရေ။ အရှုံးပီး လက်မြှောက်လိုက်စွာနန့်တူရေ။ အမှန်အကန် နားလည်ထားရဖို့စွာက ဒေချင့်စွာ ယင်းလူကုမ္ပဏီမဟုတ်၊ အမျိုးသားရေးအခန်းကဏ္ဍဖြစ်တေဆိုစွာကို နားလည်ထားဖို့လိုရေ။ ဖြစ်သင့်စွာက ယင်းလူမှားစွာတိလုပ်နီဂေ စေတနာမှန်မှန်၊ အချက်အလက်ခခိုင်မမာနန့် ထောက်ပြရဖို့၊ အဖွဲ့ဝင်အများစုသဖောမတူဂေ ဒီမိုကရေစီစနစ်အရ ပြန်လို့ရွီးကောက်တင်မြှောက်ပိုင်ခွင့်ဟိရဖို့။ မဲပီးပိုင်ခွင့်ဟိဖို့အတွက် ကိုယ်ကိုယ်တိုင်က ယင်းအဖွဲ့ဝင်ဖြစ်နီဖို့လိုရေ။ ကိုယ့်မဲတပြားက လီထက်မာ အွင်လိုင်းထက်မာ ပစသရမ်းနီစွာထက် အဆပေါင်းမရွီတွက်နိုင်အောင် ထိရောက်တေ။ လက်တွိလေ့ ကျရေ။
မူဝါဒ၊ လမ်းစိုင်တိနန့် လူပုဂ္ဂိုလ်ကို ခခွဲခခြားမြင်တတ်ဖို့လိုရေ။ ရခိုင်လူငယ်တိုင်း ရခိုင်အဖွဲ့အစည်းတိမာ အဖွဲ့ဝင်ဖြစ်နီသင့်ရေ။ ကမ္ဘာအရပ်ရပ်မာ ဟိနီရေ ရခိုင်အဖွဲ့အစည်းတိ တပေါင်းတည်း၊ အရိပ်တခုတည်းအောက်မာ ရောက်လာရေနိမာ ငရို့တိအားနန့် ရန်သူကိုမျက်ဖြူဆိုက်စီရဖို့။

အထက်မာပြောခရေ လူမှုရေး၊ ဘာသာရေး အစဟိရေအသင်းအဖွဲ့တိအားလုံး အယင်တပေါင်းတစည်းတိဖြစ်အောင် အယင်လုပ်ကတ်ရဖို့။ ဒေပိုင် အဖွဲ့အစည်းချေတိမာ ရည်ရွယ်ချက်၊ ရည်မှန်းချက်တိက ပါတီအဖွဲ့အစည်းတိလောက် ကကြီးမမားမဟိရေအတွက် ပေါင်းစည်းရစွာပိုလွယ်ဖို့ထင်ရေ။ ရခိုင်ပြည်သူပြည်သားတိနန့်ဖွဲ့စည်းထားရေ အဖွဲ့အစည်းချေတိပေါင်းစည်းမိစွာနန့် အကျွန်ရို့ ဇာလမ်းကိုလားချင်လဲ။ လားချင်ရေလမ်းကို အကျွန်ရို့ပြောဖို့။ အမြင်တူရေပါတီတိ လိုက်လာလိမ့်မေ။ အမြင်မတူရေ ပါတီတိ ကျန်ခလိမ့်မေ။ ကျန်ခရေပါတီတိစွာလေ့ ပြည်သူနောက်ခံအင်အားမဟိယာဖြစ်လို့ တောင်းဆိုး၊ ပလုံးဆိုးတိပိုင် လီမာရွင့်လို့ ပျောက်လားလိမ့်မေ။ ပြည်သူနောက်ခံအင်အားမဟိဘဲနန့် လူတယောက်စ၊ နှစ်ယောက်စနန့် အဟြက်မဟိရေမျက်နှာနန့် ပါတီနာမေခံဘနာ ဖျက်မြင်းလုပ်နီကေ ရခိုင်ပြည်သူတိ ဒါဏ်ခတ်စွာကို အလှပလှ ခံဂတ်ရလိမ့်မေ။ ဒေပိုင်စွာတိကို စိုင်းစားမိတိုင်း လှိုင်း (ဂစ္ဆပ) ရွီးရေ “မျဉ်းမတ်တိ” ဆိုရေ ကဗျာထဲက စာသားချေတိကိုစီ လားအတွက်ပေါ်ရေ….

ကျောက်ဆောင်ကိုအားကျ
ဂျောင်သျှေထဲက ဖွဲရာကျသျှေတရွီ
ဆကြွီဒဿနတိနန့် ကျင်ကိုင်
သီအိုရီမှိုတက်တိနန့်  ရထားပြိုင်ဆွဲယင်း
လိုင်ကြောတင်းရေလို့  ဆိုချင်ဆို
အပိုမယှိရေ သိက္ခာတချပ်ကို
အလိုယှိရေ ရိက္ခာတနပ်မျိုဖို့ 
အချိုသကာ ပုရစ်မျက်နှာတပိုင်းနန့် 
သမိုင်းဘင်းဂျီ မခံနိုင်။

တော်လှန်ရေး ဂေါင်းဆောင်တိကိုလေ့ သမိုင်းဘင်းဂျီအဖြစ်မခံဂတ်ပါကေ့လို့ တောင်းပန်ချင်ဘာရေ။ ရခိုင်ပြည်နန့် ရခိုင်လူမျိုးတိ မျက်နှာကိုထောက်ကတ်ပါဖိ။ တခြားလူမျိုးတိမာ စည်းလုံးနီဂတ်ယာ။ ကရင်မာ KNU နန့် DKBA ပေါင်းနီကတ်ယာ၊ ရှမ်းမာ SSA တောင်ပိုင်းနန့် မြောက်ပိုင်း ပေါင်းနီဂတ်ယာ။ အောက်သားတိမာ သိန်းစိန်နန့် အောင်ဆန်းစုကြည် ပေါင်းဖို့ပျင်နီယာ..အကျွန်ရို့ ရခိုင်တိ ဇာဖြစ်လို့ မပေါင်းနိုင် ဖြစ်နီရစွာလဲ။ ဇာဇာ အာဃာတဟိခကတ်လို့၊ ဇာအကျိုးစီးပွါးကို မျှော်မှန်းလို့ မပေါင်းနိုင်ဂတ်လဲဆိုစွာကို ပါတီဂေါင်းဆောင်တိ ပြည်သူကိုဖြေယှင်းချက် ပီးရဖို့ဒေ။ ယင်းပိုင်ရာမဟုတ်ခကေ ဂေါင်းဆောင်ကြီးတိ မျိုးဆက်သစ်သားသမီးတိကို ရခိုင်လူမှုအသိုင်းအ၀ိုင်းထဲမာ သစ္စာဖောက်သားသမီးတိအဖြစ် ချန်ထားခဂတ်ဖို့လား ဆိုစွာကို အလီးအနက်စိုင်းစားဂတ်ပါ။

ဂေါင်းဆောင်ကြီးတိသက်တမ်းအပြင် နောက်လာဖို့သားစိုင်မြီးဆက် ရခိုင်ပြည်သူတိဘားမာ ခွီးပုတ်လောက်ကျဘ၀နန့် အသက်ဟြင်ကတ်ရဖို့ယေ။ စကားလုံးအသုံးအနှုံးတိရိုင်းလို့ တချို့က ကြိုက်ချင်မ ကြိုက်ဖို့။ မကြိုက်ကေလေ့ မတတ်နိုင်။ တခါတရီမာ လူတချို့ကို ဒေပိုင်စကားလုံးတိနန့်ရာ တန်ရေ။ ရုန့်ရင်းကြမ်းတမ်းရေစကားလုံးတိစွာ စည်းလုံးညီညွတ်မှုအတွက် အဆိပ်အတောက်ဖြစ်မှန်းသိရေ။ ဒေစကားလုံးတိစွာ ဇာလူတယောက်ကိုလေ့ ဦးတည်တိုက်ခိုက်နီစွာမဟုတ်တေပိုင် ဇာပါတီ၊ ဇာဂေါင်းခေါင်တိကိုလေ့ ဦးတည်ဘနာ ပြောနီစွာမဟုတ်ပါ။ အတွေးအခေါ် အယူအဆတိနန့် မဟာဗျူဟာ၊ နည်းဗျူဟာတိကို မြင်သလောက် ထောက်ပြစွာရာဖြစ်တေ။ စကားကြီး၊ စကားကျယ်ဖြစ်လားခလားတော့ မသိ။ (ထင်ချင်ပိုင် ထင်လီဂတ်ဖိ)

တော်လှန်ရေးကို အရှိန်မြှင့်ရဖို့….အောက်သားကျူးကျော်သူ နယ်ချဲ့တိကို မတော်လှန်နိုင်သမျှ၊ ကျွန်ဘ၀က မလွတ်မြောက်သမျှ ရခိုင်လူမျိုးတိ လူဖြစ်ရကျိုးနပ်လီဖို့မဟုတ်။ ယင်းဇူးနန့် ရခိုင်သား၊ သမီးတိုင်း ရင်ထဲ အသဲထဲမာ ဒေကောင်တိကို တော်လှန်ရဖို့ဆိုရေစိတ်ကို အသွီးထဲ၊ အသားထဲ၊ ရိုးတွင်းခြင်ဆီထဲမာ စွဲနီအောင် ထည့်ထားဂတ်ရဖို့။

ပါတီတိကို ဒေပိုင်မြင်ရေဒေ။

ရခိုင်တော်လှန်ရေးပါတီတိကို အကြမ်းဖျင်းသုံးသပ်ရဂေ တဆက်ဆက်ဆုတ်ယုတ်လာစွာကို မြင်နီရရေ။ (ဂနိဆိုဂေ မြန်မာပြည်အသိုင်းအ၀ိုင်းမာ အထီးကျန်ပိုင်ဖြစ်ပါလတ်တေ။ ယကေလေ့ လားရေလမ်းကြောင်းချင်း မတူလို့ ယင်းကိစ္စကို ကောင်းစိုင်းစားစရာမလိုလို့ထင်ရေ။) ရခိုင့်တော်လှန်ရေးပါတီတိ ဇာဖြစ်လို့ ဒေပိုင်ဆုတ်ယုတ်လာလေ့ဆိုစွာကို ပြန်သုံးသပ်ရကေ လူငယ်မျိုးဆက်သစ်တိ မမွီးထုတ်နိုင်လို့၊ မဟိလို့၊ လူငယ်တိကို နီရာမပီးလို့ ဖြစ်တေ။ ယင်းထက်ပိုဆိုးစွာက ပြည်သူတိနန့် ဆက်စပ်နိုင်မှု အားနည်းလို့ဖြစ်တေ။ ရခိုင်တော်လှန်ရေးအဖွဲ့တိစွာ ဒေနိခါဇာနန့်လားတူလဲဆိုဂေ ခြာချိုင်ကောင်နန့် တူနီရေ။ အလယ်မာ ခါးပြတ်နီရေ။

တချို့အဖွဲ့တိဆိုဂေ ပပွင့်လလင်းဝေဖန်ရကေ တိုင်းရင်းသားတိအချင်းချင်း မဟာမိတ်ဖွဲ့စွာမာတောင် ဒုတိယတန်းစား အဆင့်အတန်းနန့် ရရိုင်းပြောရဂေ အရက်ဝယ်၊ ကြက်သတ်၊ ထမင်းချက်အဆင့်နန့် တိုင်းပြည်နန့်လူမျိုးမျက်နှာကိုမထောက် ကိုယ်ရို့တော်လှန်ရေးအဖွဲ့ဟိရေဆိုစွာကို ပြချင်လို့ ဒူးထောက် ဖဗြားမှောက်ဘနာ တောက်တဲ့ကပ် ကပ်နီကတ်စွာတိကိုလေ့ မမြင်ချင်အဆုံး မြင်နီဂတ်ရရေ။ နိုင်ငံရေးသိက္ခာလေ့ မဟိ၊ အမျိုးသားအကျိုးစီးပွါးဆိုစွာကို စိတ်ပင်မကူး၊ ကမ္ဘာမီးလောင် သားကောင်ချနင်းဆိုရေပိုင် ရခိုင်ပြည်နန့် ရခိုင်လူမျိုးသိက္ခာကို ကိုယ်ကျိုးအတွက် ချနင်းပလိုက်စွာဖြစ်တေ။
(ဆက်ဖို့ဟိသိမ့်ရေ)...